આજરોજ સાથ ચેરિટેબલ ટ્રસ્ટ દ્વારા સંચાલિત યુવા ઉડાન યુથ એમ્પ્લોયેબિલિટી સ્કિલ્સ પ્રોગ્રામમાં જોડાયેલા ITI વાગરા અને ITI આંકોટના વિદ્યાર્થીઓ માટે ITI આંકોટ ખાતે એક ઉત્સાહપૂર્ણ સ્પોર્ટ્સ ઇવેન્ટનું સફળતાપૂર્વક આયોજન કરવામાં આવ્યું હતું. શૈક્ષણિક પ્રવૃત્તિઓ સાથે રમતગમત દ્વારા વિદ્યાર્થીઓમાં ટીમ વર્ક અને તંદુરસ્તીના મૂલ્યોનું સિંચન કરવાના ઉદ્દેશ્ય સાથે આ કાર્યક્રમ યોજાયો હતો. આ રમતગમત મહોત્સવમાં PPG એશિયન પેઇન્ટ્સના પ્રતિનિધિઓ ગૌરંગ મિશ્રા અને સૂરજ પ્રજાપતિ ખાસ મહેમાન તરીકે ઉપસ્થિત રહ્યા હતા.
તેમની સાથે CRC કોઓર્ડિનેટર ફૈજલ રઠોડ અને તેમની ટીમ તેમજ ITI સ્ટાફ પણ મહેમાન તરીકે હાજર રહીને વિદ્યાર્થીઓને પ્રોત્સાહિત કર્યા હતા. આ ઇવેન્ટમાં ITI વાગરા અને આંકોટના આશરે 150 જેટલા ખેલાડીઓએ ઉત્સાહપૂર્વક ભાગ લીધો હતો. વિદ્યાર્થીઓએ ક્રિકેટ, ખોખો, ચેસ અને વોલીબોલ જેવી વિવિધ રમતોમાં તેમની રમતગમતની પ્રતિભાનું પ્રદર્શન કર્યું હતું. સ્પર્ધા દરમિયાન ખેલાડીઓમાં જોવા મળેલા ઉત્સાહ અને ખેલદિલીના ભાવે સમગ્ર વાતાવરણને જીવંત બનાવ્યું હતું.
સ્પર્ધાઓના અંતે વિજેતા ખેલાડીઓને સાથ ચેરિટેબલ ટ્રસ્ટ દ્વારા ઉપલબ્ધ કરાયેલ ટ્રોફીઓ એનાયત કરવામાં આવી હતી. આ ટ્રોફી વિતરણ PPG એશિયન પેઇન્ટ્સની ટીમ દ્વારા કરવામાં આવ્યું હતું. જેણે આ કાર્યક્રમની સફળતામાં સહયોગ પૂરો પાડ્યો હતો. આ પ્રકારના આયોજનથી વિદ્યાર્થીઓને શારીરિક અને માનસિક રીતે સ્વસ્થ રહેવાની સાથે સાથે સહકાર અને નેતૃત્વના ગુણો વિકસાવવાની તક મળી રહે છે. સાથ ચેરિટેબલ ટ્રસ્ટનો આ પ્રયાસ યુવાનોના સર્વાંગી વિકાસ માટે પ્રેરણારૂપ બન્યો છે.
Author: Saddam Bhatti
Owner Of Digitalyugnews.com સમાચાર તેમજ જાહેરાત માટે સંપર્ક કરો 9723530092, 9510004755
